蟹肚密碼原來是價錢 $2100一隻凍蟹富豪被「劏」
[轉載/Youtube] 食肆海鮮菜式以「時價」出售屬慣常做法，但有不少名人惠顧的灣仔新光潮州菜館，卻被指以「時價」100元一両賣超貴凍蟹而引發一場風波。有城中富豪早前偕友幫襯新光，其內地友人點了一隻凍蟹，吃掉後才知賣2,100元一隻，事主堅稱店員沒講明價錢，亦不清楚蟹肚寫上的數字原來是代表價錢。店方強調價錢寫在蟹肚是一貫做法，否認店員有意隱瞞價錢。 不願身份被披露的鍾先生為一家公司的董事，生於大富家族，在中環擁有整幢商廈物業，身家逾10億。他自言平時食飯只嚐佳餚而鮮問價錢，「食飯用幾多錢都唔重要，要睇吓值唔值」，但連一向豪氣的他都覺得這次被菜館「生劏」。
「冇講過要成2100蚊」
事緣上月23日深夜，鍾偕一男一女友人到新光食消夜，點菜前他與男友人有事出外，留下內地女友人；當他們回座後女友人稱已點好菜，「當日我哋叫咗三個餸，其中一個係凍蟹」。到結賬時查閱賬單，鍾發現合計2,514元。「睇番另外兩碟餸都係七十幾蚊一碟，點解隻蟹要收成二千幾蚊？」他禮貌地要求侍應檢查賬單是否出錯，但結果一樣。「佢哋根本冇講過隻蟹要成2,100蚊！」鍾說。
三人與侍應理論，對方堅持女友人點菜時知道凍蟹價錢，「佢（女友人）話有見到個蟹肚寫住『2100』，佢哋（店方）唔講根本唔知係乜嘢意思……如果佢（女友人）知道隻蟹要成二千幾蚊，一定唔會叫，就算叫都會問過我哋先」。爭論期間，店員提議打九折，但鍾拒絕，代之要求店方由負責落單的侍應寫一張收據列出該餐價錢。鍾最終付足錢離場，他說發現該店多內地人幫襯，質疑是否有內地客被搵笨。
「去消委會投訴我吖」
記者日前上門向負責人忠哥了解，他初時表現緊張，多番說：「（有問題）去消委會度投訴我吖嘛……」其後記者表明來意他才冷靜下來。當日負責落單的姓嚴侍應亦在場，向記者指當日鍾先生未到，其兩名友人則在一角座位坐下，「個男人揀咗蟹、睇咗，講埋畀佢聽……就決定斬出嚟」，之後其他人回來食完埋單鍾先生才回來，「有啲似想攞着數」。他稱當時客人確有問過：「點賣呀？」店員亦曾大聲回答「兩千一」，到結賬後出現爭拗時，「個客又話只聽到『兩斤一』」。
嚴又稱，他們的凍蟹一早在蟹肚標明價錢，而且他和同事都會向客人說明，「好多客都以為（數字）係解斤両，我哋會話番畀佢哋聽……上蟹一定會講價錢，翻轉畀佢睇、講埋價錢畀佢聽，要個客點頭我哋先攞去斬」，而且肯定不會「斬咗先講（價錢）」，「斬咗就冇得郁，個個都知」。他表示客人為價錢起爭拗「都唔係第一次……我哋上去消委會一樣係咁解釋」，當記者問及為何之前要上去消委會時，他回應指大陸客經常要求「食完飯打折」，「我哋印埋Ten percent（加一服務費），佢都可以話叫我哋cut（刪）咗去」。
聲稱成本每斤500元
記者發現，菜館所賣的凍蟹比市面所見的大，其中一隻兩斤重大蟹賣2,900元。忠哥解釋，蟹是越大越貴，店內所賣的花蟹購自潮州及香港仔魚市場，質素相當好，不論大小都不能有缺損，否則會惹來客人投訴。他又指入貨時常被騙，「撈埋啲水草都成半斤重」，加上舖租、水電等雜費，凍蟹成本要400至500元一斤，最終售價便要貴一點。忠哥強調店方絕不會騙人，會提醒員工必須在點菜時向客人講清楚價錢。
