鄧上文誕 8磅混血仔
[轉載/Youtube] 有屯門王子之稱嘅鄧英敏前日升呢做咗外公，佢個寶貝女鄧上文喺法國醫院順產生咗重 7磅 15安士嘅囝囝，取名 Maddox，母子平安。現年 28歲嘅鄧上文係 05年港姐最上鏡小姐，佢當選後成為無綫藝員，去年 3月喺泰國同澳籍健身教練男友 Andrew共諧連理，結婚啱啱一年就增加家庭新成員。鄧上文噚日發放一家三口合照，新任媽咪抱住 BB手勢好純熟，由於 BB係混血 B，所以輪廓分明，雙眼皮好深，當父母為 Maddox影相時，佢眼睛瞇開偷望，又撐起雙手，好有爸爸嘅運動細胞，非常精靈。
鄧英敏幫手湊
鄧英敏抱住乖孫 Maddox，愛不釋手，佢噚日喺電話訪問話：「我女婿雖然係外國人，但佢之前喺中大讀書改咗個中文名樂深，所以囝囝就改咗叫樂然，希望佢可以喺快樂同自然嘅環境下成長。」鄧英敏表示鄧上文今年 10月已約滿無綫，由於當時待產冇續約，佢希望產後多啲時間照顧 BB，會餵人奶，鄧英敏話：「我啲時間好自由，太太又啱啱讀咗個陪月員課程，正好大派用場，我哋全家都會動員幫手湊孫。」
