情侶檔搵銀有着數 小儀、張嘉兒搶金剛
[轉載/Youtube] 金剛雖然其貌不揚但桃花不絕，多年前已和港姐張嘉兒傳緋聞，另外又有台灣辣妹女友Ashlee，不過近日有指他跟小儀撻着。前晚金剛、張嘉兒和小儀同場錄影，張嘉兒坦言羨慕金剛與小儀傳緋聞帶挈搵真銀，笑言要與小儀爭過。來自台灣的金剛近年備受無綫重用，早年和港姐冠軍張嘉兒傳過緋聞，期間金剛被發現一直有位台灣辣妹女友Ashlee，不過近日卻有傳他和小儀發展姊弟戀。前晚金剛和張嘉兒到電視城錄影《千奇百趣高B班》，小儀和森美繼續做主持，三位緋聞主角同場，但他們表現大方，應記者要求一同合照，小儀還搞鬼地叫張嘉兒做「大婆」。
世界末日
藝人傳緋聞後，合作機會增加，出外接job搵真銀，不過張嘉兒直言多年來反而未有和金剛搵銀的機會，她說：「真係冇人搵我同金剛做嘢，點知家佢同小儀就有，真係唔公平，好唔抵，我要叫小儀讓啲畀我先得。」
金剛緋聞不絕，艷福無邊，他竟說：「我覺得2012年真係世界末日，到咗㖭啦，原本我對生命充滿希望，但家冇喇。」張嘉兒和小儀之中會揀哪個？金剛直言兩女皆不是他杯茶，還踢爆小儀心有所屬：「佢係鍾意啲CEO級。」小儀回應稱：「係呀，但我鍾意唔代表人哋都鍾意我。」
大方讓愛
小儀笑言讓金剛給張嘉兒沒有所謂，但搵銀機會則會留給自己。記者指以緋聞情侶檔出騷酬勞可以收貴些，金剛即說：「係咪可以㗎？咁一定要收貴啲，平時我收得唔高。」
