亞視打手潛入無綫網 辣火頭遭報復
[轉載/Youtube] 亞視積弱多年，遲吓再有三個免費電視台加入競爭，嚇到佢哋即刻出招拖住政府唔畀發牌，另一方面又好積極咁催谷自己嘅節目，不過招數太低，淪為笑料。馮仁昭近日發現疑似亞視嘅打手入侵無綫官方網嘅myTV，分別喺《On Call 36小時》、《4 In Love》同《結．分＠謊情式》嘅留言板度，勁彈剛推出嘅《On Call 36小時》唔掂，仲話場面血淋淋，兒童不宜，之後硬銷叫觀眾轉台睇亞視嘅《義本同心》。
疑似亞視打手咁踩場，無綫擁躉即刻留言鬧爆，話走嚟無綫地頭賣廣告嘅行為好cheap，有無綫擁躉仲去埋《義本同心》個討論區反踩場，貼上《On Call 36小時》嘅角色關係表。馮仁昭問亞視公關發言人，佢話冇請過打手，唔排除係鍾意亞視嘅觀眾咁做。
《義》劇輸得甘
你踩場都冇用，無綫噚日公布上周收視，《On Call 36小時》首播收視平均29點，有超過185萬觀眾，反觀《義本同心》得嗰兩點，都冇13萬人睇，真係點谷都冇用。
