我唔要做特首呢份工！
[轉載/Youtube] 狼仔嘅紮腳趾媽媽、豬仔嘅唐媽媽唐尤淑圻，唔知係咪一直都好想自己嘅Baby成為下屆香港特首呢？但一項調查顯示，今時今日嘅港媽，根本唔想自己嗰仔做官，更加唔想佢哋做特首。外國小朋友嘅志願，好多時係做總統；八方估計，港孩家長好務實，可能明白做特首呢樣嘢要經北京阿爺點頭，唔係想做就可以做到。龍年將至，望子成龍呢四粒字一定hit爆。有商場同藝人陳敏兒創辦嘅「家長匯習」搞咗個「望子成龍」調查，睇吓家長想唔想下一代成龍成鳳。佢哋透過網上問卷，問咗超過3,000位家長及5至18歲小朋友。結果發現，香港嘅家長都唔係咁怪獸。
爸媽首望子女健康快樂
港爸、港媽、港童嘅十大希望，最後三名一模一樣。排「包尾」嘅係做特首，「尾二」係做超級巨星，排尾三係做政府官員。即係話，做龍、做星、做官，全部都唔係家長小朋友「嗰杯茶」。
負責調查嘅家長匯習家庭教育執行幹事陳秋容話，結果反映新一代對社會及政治歸屬感偏低，小朋友並唔着重坐擁權力或知名度，最重要都係呢一句：「近年政府多番出現負面新聞，社會不斷批評政府工作表現等現象，亦有機會影響新一代嘅心態。」
唔做特首，港爸媽對仔女十大願望又係咩？第一名係「成為健康快樂的人」、第二就係「有自己理想」、第三就係每日同父母多傾偈。開開心心，追求理想，可能港媽呢排追完CCTVB嘅《天與地》，搞到開咗竅。而小朋友「第一願望」當然係努力讀書，僅隨其後係「考入大學」同「成為健康快樂的人」。
陳秋容話，大部份小朋友側重學業成績，可能因為港孩成日都要補習追成績，爭入名校、競爭大，務求係填鴨式嘅教學制度下，奪取佳績。聽落，都幾悲哀。
