私駕路：拜到邊叉到邊 零油錢拜年
[轉載/Youtube] 新年幾日假除了要拜年，又要睇煙花、拜黃大仙，租部車出入的確方便唔少，今年仲可以租電車直插停車場泊住叉，唔只零油錢，連搵位泊的時間都慳埋！4日3夜$2,860
年初一馬不停蹄去拜年、初二晨早去霸靚位睇煙花、初三又要去黃大仙求神，放假隨時仲忙過返工，與其出街搭車同人逼，一家大細租車隨時最化算。想再慳啲？索性租部電動車，慳回的油錢食多餐飯都仲得！日產LEAF能輸出109匹馬力及280Nm扭力，不遜2公升級別私家車。加上大昌行汽車租賃新年推出租車優惠，4日3夜租金$2,860，平均每日$715，仲平過租車廂細一個碼的VW Golf。
「租電車怕唔怕中途無電㗎？」唔使驚，據廠方指LEAF的續航距離有160公里，即使八折後仍有128公里，出入市區無問題，另外ECO模式亦可額外「榨出」約20公里。儘管如此，租車公司還是建議來回郊區途中停車充電。另外要時刻留意位於錶板右方的電量計（非剩餘里數），如跌至紅色水平就要準備充電，切忌冒險挑戰電池極限。
