朱凱婷誕6磅女 心急餵人奶
[轉載/Youtube] 朱凱婷01年選港姐獲季軍，舊年佢嫁畀拍拖5年嘅飛機師男友Dickens Lam，婚後兩人過咗短暫嘅二人世界後，朱凱婷心急為老公傳宗接代，兩人都積極展開造人計劃，最後成功製造小兔女。今年年中朱凱婷宣佈成功懷孕，之後佢刻意減少工作，上月佢挺住大肚子出席無綫「長期服務暨傑出員工」榮譽大獎頒獎典禮晚宴，佢親自領取完十年金牌，就全面停工準備做媽咪，前日佢喺沙田仁安醫院剖腹產女，母女平安，小B女重6磅12安士。
爸爸興奮剪臍帶
朱凱婷夫婦第一時間同囡囡改咗英文名Sheryl，小B女生得精靈可愛，外貌似足媽咪。產後朱凱婷第一時間餵人奶畀囡囡食，仲興奮話：「我喺手術室第一次聽到個女嘅喊聲，真係非常感動，自己只係希望囡囡可以健康快樂咁成長。」而啱啱榮升做爸爸嘅Dickens原來亦有陪伴愛妻入產房，之後佢仲親自為愛女剪臍帶，令佢又激動又興奮。
