樂樂冇腰骨 搞唔掂盈盈
「盈盈」「樂樂」交配不成 打架收場
熊貓盈盈樂樂未能自然交配
[轉載/Youtube] 豬狼惡鬥，海洋公園兩隻大熊貓盈盈同樂樂睬佢哋都儍，懶理館外黑材料滿天飛，喺2月尾嗰三日趁盈盈發情，閉館翻雲覆雨五次想行埋，可惜佢兩個經驗少，最終都係搞唔成。交配期前訓練下盤
海洋公園噚日話，雄性大熊貓7歲就大個仔可以交配喇，樂樂仲係6歲，細路仔，第二日仲大把機會。其實樂樂想一矢中的除咗要有經驗，有腰骨都好緊要，話晒佢成120公斤重，肩負全球華人對佢傳宗接代嘅期望，都真係幾攰㗎。海洋公園都唔敢怠慢，特意喺交配期前，訓練樂樂下盤嘅力量，迫佢企高攞嘢食。
盈盈仲未大肚，係唔係唔like樂樂？使唔使去卧龍搵過件新仔？海洋公園話，年輕大熊貓頭幾年行房，成功懷孕機會只有三至五成，根據其他動物園嘅經驗，有啲大熊貓相處幾年先有結果，所以唔代表佢哋唔夾。盈盈樂樂先第二次行埋，八方計落，希望唔使等到2017年，先等到香港首隻土產大熊貓喇。
做咗兩次人工授孕
海洋公園都好心急，已經同卧龍嘅專家商討對策，計劃第二時喺盈盈樂樂嘅行宮，塗抹其他熊貓嘅氣味、播吓其他熊貓叫聲，營造野外環境，加強兩隻大熊貓嘅戰意。
啱啱做咗兩次人工授孕嘅盈盈，最快7月睇到有否懷有BB，如果冇就要再等下年喇。今年係龍年，若然盈盈成功追番個龍B，佢哋嘅愛情結晶品豈不是「龍貓」？海洋公園已經為盈盈準備咗產房，一旦真係有咗，等佢生完「龍貓仔」，仲會開放晒館內所有房，俾佢揀個最靜最靚嘅床位休養，唔使憂冇床位。
