「唐唐私生女」親父好激氣
唐英年私生女曝光
[轉載/Youtube] 唐唐接受傳媒訪問時默認有私生子，搞到老婆郭妤淺要晨咁早去電台為老公拆彈，其實唐唐今次唔止連累老婆，仲累埋街坊。前日多份報章，包括《爽報》晚版刊登咗一張疑似係唐唐私生女嘅相片，相片出街後，唐唐既不承認，又唔否認，一副置身事外嘅態度。不過，讀者陳先生睇完幅相，就㷫過辣雞！事關佢就係相中少女嘅爸爸，寶貝女俾人擺上枱，唔嬲就假！
睇人格嚟揀 有票都撐豬
陳先生同八方講，囡囡幾個月前已發現俾同學喺網上惡搞，當時不以為然，殊不知搞到咁大鑊，前日赫見到自己成為頭條新聞主角，好唔開心，學都唔敢返，怕俾人指指點點，為人父親嘅陳先生，個女搞成咁，當然激氣。
陳先生個女今年18歲，讀緊大專，喺香港出世兼長大，「百分之一百係我個女」，佢認為唐唐事後冇否認相中人係私生女，明顯「身有屎」。不過佢好大方，話唔會同唐唐計較，仲話如果自己手上有票，都可能投畀唐豬，點解？佢話，講能力雖然狼振英好啲，不過講人格，始終唐唐佔先喎。
陳先生話今次幫囡囡出頭，唔係想追究責任，只係想澄清事件，還囡囡清白。佢仲苦口婆心提醒傳媒，日後報道新聞時要小心求證。
八方收到晒，希望佢睇完隔籬嗰段《沙膽虹手記》嘅道歉文章，條氣會順番晒啦。
