李丞責同鞋白首冧劉倩婷
[轉載/Youtube] 早前李丞責向劉倩婷求婚成功，即刻以情侶檔身份做嘉賓賺外快，佢哋透露婚期未訂，但預計係年底或明年初嘅事，李丞責話要儲吓老婆本先，所以話到明情侶檔工作來者不拒。最快年底娶
噚日劉倩婷同李丞責着晒情侶裝、情侶鞋出席中環嘅S.T.Dupont龍年限量金鑽打火機嘅開運儀式，大會安排佢兩個手拖手撻着個限量版火機，寓意兩人點着愛火，仲打得火熱，真係鬼咁肉麻。事後問到佢哋係咪有夾過着乜衫？劉倩婷話有傾過吓啦，身邊嘅李丞責就話着同款鞋取其「同諧白首」，咁識講嘢唔怪得咁快到劉倩婷應承嫁畀佢啦！
至於婚期，李丞責話越諗就越多人要請，要儲吓錢先，暫定今年底或者明年初。講到情侶檔酬勞，佢哋話唔係刻意做成情侶檔，不過酬勞幾好，真係唔介意多啲人搵佢哋做嘢喎！咁情人節就快到，佢哋會點慶祝呢？倩婷話當日係佢媽咪嘅生日，所以會帶埋男友一齊食飯，李丞責話未來外母對佢好好，求婚當日雙方家長都見過，係一個好圓滿嘅求婚過程。
