[轉載/Youtube] 噚晚英皇娛樂喺灣仔會展搞春茗，筵開70席款待圈中好友，旗下嘅謝霆鋒、容祖兒、Twins、林峯都有出席，跟住仲做埋鄭嘉穎、羅力威嘅簽約加盟儀式。拍緊《雷霆掃毒》嘅林峯講到嘉穎加盟，佢話大家都跟戴思聰學唱歌，現終再做師兄弟，咁佢驚唔驚嘉穎爭獎呀？阿峯話公司人才濟濟係好事，高層個個都會撐佢哋。大師姐祖兒噚晚好豪咁攞幾萬蚊出嚟抽獎，講到嘉穎同林峯一山不能藏二虎，祖兒講笑話佢地要有競爭至好睇。霆鋒開戶外騷
近排放假做咗住家男人嘅霆鋒，就話唔知有新同事加盟，係咪因為佢唔再唱歌至簽新歌星呀？霆鋒話未知仲出唔出碟，但就搵緊個可容納二萬人嘅戶外場做演唱會。霆鋒嚟緊會請晒啲同事去馬來西亞度假，兩個仔就交畀前妻張栢芝照顧，佢話栢芝已經搬咗去世紀大廈個新竇，自己仲上過去參觀，睇嚟關係都算唔錯。
聽日離職嘅無綫總經理陳志雲都嚟咗，講到動向，佢話之前主動同無綫提出，呢兩年內都唔會喺香港嘅電視媒體返工，至於外國機構，陳總話傾過但未有新方向。
