舒淇生孖B唔預王力宏
[轉載/Youtube] 舒淇、余文樂同導演黎妙雪噚日喺荃灣為新戲《情謎》宣傳，舒淇喺戲中分飾兩角演孖女，現實中舒淇爸爸同大伯都係孖生，即係舒淇好大機會生對孖B，佢就話：「一次生兩件都可以試吓喎，不過留畀細佬生先，我要等有緣人出現。」話時話，之前傳舒淇翻撻王力宏，佢聽到即刻好唔耐煩話：「呢個係陳年舊聞，問完又問，傳完又傳，你唔煩我都煩啦！」提到舒淇有意搬屋，但佢呻香港樓價貴，叫香港政府要諗吓計仔。
樂仔讚Jay大鵰
講到《春嬌與志明》同《情謎》打對台，身為兩套戲男主角嘅樂仔話唔算，因為一套月頭上，一套月尾上。問樂仔知唔知楊千嬅幾時生？樂仔話佢唔方便跑海外宣傳，都有一排冇見。另外提到樂仔老友周杰倫（Jay）日前喺台灣出席活動，褲襠現巨鵰，樂仔大笑話唔多信：「褲嘅效果啫，未必係佢本人厲害，點會係大鵰呀，剪裁嚟，唔好講到咁猛，嚇鬼咩！」但樂仔見到張相就話：「嘩，進步咗喎！」問樂仔幾時着嗰啲褲同Jay比較？佢話：「我哋唔鬥呢啲，咁可能真係犀利，最自由係佢啦，連小鳥都自由埋！」
