成功爭取香港有企鵝
[轉載/Youtube] 民建聯張國鈞成功爭取北極有企鵝，海洋公園都唔弱，令到亞熱帶嘅香港，都有15隻小企鵝成功出世！大熊貓盈盈樂樂閉館翻雲覆雨五次都搞唔掂，但園內13對企鵝父母，就一擊兩中（因企鵝多數一次生兩隻蛋），除咗部份未受精嘅蛋，15隻喺舊年11至12月成功破殼，包括13隻巴布亞企鵝、兩隻跳岩企鵝，存活率100%，較野外30%至90%高。企鵝公仔扮媽媽
巴布亞企鵝頭頂有白紋，好似帶咗白色耳筒，跳岩企鵝就鍾意跳。公園陸生動物部高級館長祝效忠話，企鵝09年引入，舊年第一次繁殖成功，孵咗一對寶寶，包括Ichiko，但另一隻五周大夭折。佢相信今次成功顯示企鵝已經適應環境，7至9月主題區「冰極天地」開放時，全部74隻大小企鵝可首次同市民見面。
祝館長又話，企鵝生第一隻蛋後，隔五日生嘅第二隻會較體弱，而父母又未能兼顧，所以第二隻易夭折。佢話今次揀咗5隻細佬細妹嚟人工飼養，其他交由父母照顧。
港產企鵝都好活潑，一家樂也融融咁。以為人工飼養嘅梗係孤兒咁，但踏入飼養場，佢哋喺圍欄內都想衝過嚟，照料員話：「佢哋以為你餵魚呀。」場內擺咗企鵝公仔扮媽媽，但小企鵝反而鍾意親近24小時輪更嘅照料員：「佢哋冇咁驚人。」
祝館長話，初生企鵝頭5天會匿喺媽媽屁股取暖，人工飼養環境要模仿維持攝氏35至37度；企鵝父母會反芻半消化嘅魚餵寶寶，照料員就將多春魚、沙丁魚、銀邊魚等煮爛，切細餵小企鵝。飼養企鵝好快重返企鵝群，佢話未必認得父母，但企鵝三個月大已經獨立，而且會換成防水毛，可以游水。係咪想知小企鵝乜性別？原來佢哋性器官唔明顯，要驗血先確定性別，但太細個抽血會嚇親，所以要一年後先驗。園內另一品種國王企鵝，就未到4歲繁殖期。
