消防局落閘迎高幹
消防處「封局」做騷迎公安部副部長
[轉載/Youtube] 消防處最近「熄機」搞到傳媒再聽唔到求助消息，記者真係好難知道消防員有乜做㗎！消防局嘅「另類」用途多多，俾消防員帶friend入內影相燒嘢食又得，招呼內地高幹亦得！示範鋸車頂救傷者
就好似噚日咁，公安部副部長陳智敏帶隊訪港，朝早特登去尖沙嘴消防局參觀。京官大駕，處方識做，唔單止鋪紅地毯，仲要掛上「熱烈歡迎公安部副部長陳智敏及公安機關代表團」嘅殘體字橫額，播埋普通話解說。平日驚死傳媒知多啲嘅消防處，梗係唔會同傳媒公佈啦，點知有人好不滿，擔心啲京官訪問會阻住消防局運作，咪向記者踢爆囉。
為咗招呼高幹，消防員晨早將架訓練用嘅私家車推翻，踏正9點半，代表團車隊嚟到，處方示範鋸開私家車車頂，搶救車禍傷者。陳副部長拍手示好，參觀消防局個多小時後，成班人去咗局內碼頭，坐船走人。京官走咗，成班伙記鬆咗口氣。
有人向八方講，呢班貴賓到訪可能阻住消防局正常運作。消防處回應話，同內地官員進行咗一般訪問及交流，處方向訪問團介紹香港消處工作。消防處職工總會副主席黃國英就話︰「每次招待貴賓，局內所有人員都要暫停休假，唔知係咪有人突然冇假放唔開心呢？」
